Pagos de Brigante

A conca do río Mandeo é historicamente unha zona de importante produción de viño, pero nas últimas décadas a superficie de vide foi moito a menos e os adegueiros que embotellan e comercializan cóntanse cos dedos dunha man. Por iso, o proxecto de Pagos de Brigante supón unha nova oportunidade para a zona e unha esperanza de que o seu exemplo anime a outros a emprender un camiño non exento de dificultades, que acabaron por truncar iniciativas semellantes nos últimos anos. Pero Luís Sande, a alma mater do proxecto, está totalmente convencido do potencial dos viños de Betanzos. Durante a súa vida profesional como funcionario estivo dedicado ao control da produción nas distintas zonas vitivinícolas, primeiro desde Galicia e despois desde Bruxelas, polo que é un bo coñecedor tanto dos viños galegos como dos do resto de España e de Europa.

Con esa bagaxe, afirma rotundo que os viños de Betanzos teñen aínda por facer ese mesmo percorrido que nas últimas décadas fixeron os viños das denominacións de orixe de Galicia e que están a empezar tamén na actualidade outras zonas con IGP, como a Ribeira do Navia, os viños de Iria e Barbanza e a comarca do Morrazo.

Pagos de Brigante é unha aposta decidida pola profesionalización dos viños de Betanzos, por convertelos en homologables en calidade aos que xa se fan noutras zonas de Galicia e do mundo, pero mantendo as características que lles son propias e que os diferencian.

O enfoque do proxecto é claramente empresarial, cun investimento previsto duns 600.000 euros, dos que 200.000 están xa capitalizados en forma de activos (viñedo e adega). Os dous Luíses, pai e fillo, son os socios da SL, que conta cun equipo profesional en cada unha das facetas da empresa: Juan Veiga como xerente, Guillaume Barrier como director técnico, Maruxa en labores administrativos e de I+D+i e Diego no coidado das leiras.